السلام عليكم ورحمة الله وبركاته
أهلاً يا أصدقاء
في هالتدوينة بأتكلم عن بعض الأمور المتعلقة بحفظ الأكل مع ريفيو كامل عن جهاز تفريغالهوا Foodsaver وكل شي متعلق به..
أول ماتزوجت تقريبا قبل اربع سنوات ماكنت أعرف أي شي عن المطبخ ،
باستثناء قائمتي الشهيرة و الفاخره ، بيض ، أندومي ، وشاهي..
تبون حاجه ثانيه، صلحوا لي معكم😬
ولذلك عملتأغلاط شنيعة في البداية وارتكبت بعض الجرائم المطبخية
أشياء خربت عندي ورميتها، وأشياء أكلناها وهي على حافة الانهيار، وفيه أشياء سويت لها حجب عن الذاكره
لكن مع الوقت حسيت الوضع هذا مايصلح يستمر ، فقررتأعلقالتاج حقي على جنب و ألبسمريلتي وأحاول أتعلم الطريقة الصحيحة لكل شي متعلق بالأكل والمطبخ..
(وقفة صامته تقدير واحترام لقراري العظيم)
بديت أبحث و أستفيد منالمواقع الأجنبية و أقرأ عن المعلومات الصحية للأطعمة وطرق المحافظه على قيمتها الغذائية لأطول فتره ممكنه
ووجدت أن أفكار كثير ممكن نتخذها لتسهل علينا حفظ الطعام لأطول فتره بأفضل قيمة غذائية..
ولأني تمنيت أحد يعلمني هالأشياء من بدري أحب اني أبدأ أدون عنها
خصوصاً بعد ماجتني أسئلة كثيرة في هالمواضيع لأني أعرف أن البعض يمرون حالياً بنفس مرحلتي يوما ما..
(كل شي بأكتبه لكم من معلومات جبته من مصادر موثوقةحطيتها لكم آخر الموضوع)
أولا بأكتب لكمنبذه بسيطة جدا عن سبب فساد الأطعمة كمقدمةللحديث عن الجهاز ،
القاعدة الرئيسية : أغلب المأكولاتيفسدها الهواء
وبعض المأكولاتتفسدها الرطوبة ،الحرارة،البرودة، الجفاف،وبعضها يفسد بالنور.
فبشكل عام المطلوب نعرف كل نوع متى و كيف يفسد حتى نتوصل لأفضل طريقة لحفظه..
لكن فيه أشياء تزيد من عمر الأكل الطبيعي
مثل التبريد، التجفيف، التمليح والتحليه ، والتخليل ، وأخيرا العزل عن الهواء..
في هالتدوينة بالذات بأركز على أكثر العوامل اللي تفسد أغلب أنواع الأطعمةاللي هوالهواء..
الهواء يعتبر العدو الأول للأطعمة لأنه يحتوي على الأكسجين
كثير من أنواع البكتيريا تحتاج للاكسجين حتى تنمو،
أيضا عملية الأكسدة وتغير اللون تحتاج للأكسجين حتى تتفاعل،
وأشياء أخرى ماله داعي نفتح حصة كيمياء هنا حتى تحمست وقلبت بالفصحى هههه
الزبده انه الاكسجين مش كويس للأطعمة
~
وأنا أبحث عن طريقة أحتفظ فيها بالأكل المطبوخ وقعت على مقطع فيديو فيهجهاز تفريغالهوا food vacuum sealing system،
حسيت اني لقيت كنز، لقيت السر اللي المصانع يغلفون به أكلهم قبل مايروح للسوبرماركت،
باختصار بعد بعض الضغطات هنا وهناك حسيت اني لازم احصل على هالاختراع الرهيب..
foodsaver 2100
هالجهاز يعزل الأكل عن الهواء بدرجة كبيرة جدا وبالتالي يطيل عمر الأكل خمس مرات عن وقت فسادها الأصلي..
يعني الشي اللي يخرب خلال يوم ممكن يجلس خمس أيام مثل ماهو ،
الأفوكادو والموز اللي يسود بسبب الأكسدة في ساعات، ممكن يجلس أيام بدون مايتغير..
مو بس حلو للأشياء اللي داخل الثلاجة، حتى لبن القهوه أو المكسرات أو البسكوت أو الشيبس اللي يصير لين بعد فتح العلبة أو اللي يكتسب رائحة من الفريزر أو يتجمع حوله ثلجبسبب التفريز،
الجهاز يسحبالهواء بطريقة تخلي هالأشياء تحافظ على قوامها لشهور وسنوات ،
يعني المارشملو مايصير متعرفط وقاسي، والبسكوت و الشيبس مايصير ليّن ، يبقى مقرش كأنه جديد ..
هذا غيرأنفرزنة اللحوم والخضار بدون شفط للهواء يعرضها لما يسمى ب (حرق الفريزر)
يعني اللحم يتغير لونه يصير فيه بقع رمادية مثل الحروق،
طبعا يأثر على طعمه ولا يصير قوامه طازج ونفس الشي الخضار..
ما راح أتعمق كثير في حفظ الأنواع المختلفة من الأطعمة بإذن الله أخصص لها تدوينة مستقلة
هنابأركز على الجهاز نفسه وكيف يشتغل والنتائج والأسعار و وين تحصلونهوكل شي عن الجهاز..
جهاز شفط الهواء متوفر من شركات مختلفة لكن أفضلهاشركة foodsavor ..
أجهزة الشركة لها خاصيتين مهمات :
الأولى : شفط الهواء من الكيس أو العلب.
الثانية : إحكام إغلاق الأكياس بالحرارة.
الأكياس المستخدمه سواء من نفس الشركه أو من شركات ثانيه ،
المهم يكون مكتوب عليها أنها مخصصه لأجهزة شفط الهواء..
أنا أخذت هذا النوع
رول طويل أقص منه وأستخدم حسب المقاس اللي يعجبني،
اخترته لأن تقييمه عالي وأرخص من أكياس الشركه نفسها تقريبا بنص السعر ..
شريته مره وحده وبيكفيني لأكثر من ١٥٠ كيس بالحجم اللي أستخدمه بالعاده..
~
في الحالة الطبيعية بنحتاج كل الخاصيتين بحيث نثبت طرف الكيس على فتحة الجهاز فيتم شفط الهواء من الكيس وبعدها الجهاز يحكم إغلاق طرف الكيس بالحرارة حتى ما يخرج ولا نقطة هوا..
طبعا بهالطريقة أغلف اللحوم والخضار وأحيانا بعض الفواكه المثلجه حسب الكميات اللي عندي..
أحب أول ما أرجع من السوبرماركت أغسل صدور الدجاج أو اللحم واقطعها صغار
وممكن أتبلها أحيانا واحط في كل كيس مقدار وجبه، وبعدها أخلي الجهاز يعطينا لمسته السحرية ..
بعدين أكتب على الكيس التاريخ بقلم شاربيماينمسح
أو أقص العلامة اللي على الغلاف وألصقها على الكيس
وممكن بعد ما أسحب الهوا وأسكره اضغط الكيس لحد مايصير مسطح
عشان ماياخذ مساحه في الفريزر و بهالطريقة يذوب بسرعه إذا طلعته ..
سويت فيديو كامل عن طريقتي في تتبيل وحفظ الدجاج بينزل على قناتي في اليوتيوب بإذن الله
ونفس الشي مع أكياس الخضار المفرزن أحيانا الكمية اللي أشتريها تكون كبيره
فآخذ نصها اللي في الكيس واحطها في كيسه ثانيه واسحب منها الهوا والباقي اتركه في علبته للاستخدام في الفترة القريبة ..
بهالطريقة أحافظ على كمية كبيرة من المواد بشكلها وطزاجتها الأصليه
بدون مايجي حولها بلورات ثلج ولا تنشف ولا يتغير لونها أو شكلها وريحتها
ولا تطلع ريحه في الفريزر ويصير الدنيا حوسه وريحه..
وهذي مقارنه لقيتها في هالمدونة
حفظوا بروكلي في أكياس محكمة الغلق (الزبر باق العادية) وخلوها ثلاث شهور في الفريزر ،
وحطوا بروكلي في كيس وسحبوا منه الهوا وتركوه خمس شهور في الفريزر ،
وهذي النتيجة:
طبعا مو بس في أغراض الفريزر نستخدم الجهاز ،
ممكن نغلف فيه كميات التمر أو المكسرات أو البن اللي ماراح نستخدمها بسرعه..
مثلا أنا ما أقدر استخدم كل المرتديلا بفتره بسيطه فأطلع نصف الكميه وأغلفها
عشان إذا خلصت الكميه اللي عندي يصير الباقي طازج أكثر من لو كان مايزال في الكيس اللي كل شوي آخذ منه.،
و أكتب عليه التاريخ واسم المنتج
وأتوقع يدوم أطول بأيام من تاريخ الانتهاء لو ماتم فتحه..
لقيت ناس مايكتفون باستخدام الجهاز للأطعمه ، بعضهم يغلف لصقات الجروح واللواصق حتى ما تخرب المادة اللاصقة مع الزمن..
يعني باختصار أي شي بنحتفظ فيه فتره طويله ومانحب الهوا أو الغبار يخربه نقدر نغلفه بهالطريقة..
~
في بعض الحالات نحتاج فقط للتفريغ الهواء بدون إغلاق حراري.
حالات استخدام هالخاصية على عدة أشكال :
أولا : أكياس الزيبر.. الي نفتحها ونغلقها بواسطة شريط
وهذي مناسبه للمواد اللي نفتح غلافها باستمرار ثم نغلقهامثل شرائح الجبن والمرتديلا والمكسرات وغيرها..
الجهاز حقي نفسه يجي معه قطعه مخصصه لهالنوع من الأكياس ولكن مو أي كيس يصلح،
فقط اللي يكون مكتوب عليها انها تقبل جهاز الشفط يكون فيها فتحه صغيره فوق مخصصه للمكان اللي توضع فيه القطعة .. مثل الصورة اللي فوق ..
المربع اللي على اليمين هو المكان اللي نحط عليه انبوب الشفط ..
القطعة الخاصة بهالنوع من الأكياس، نوصلها بالجهاز ونحطها على الدائرة اللي في الكيس..
وكل مره نفتحها بسهوله زي أي كيس عادي ، ونرجع نسحب منها الهوا في ثواني..
بعض الأجهزة الأصغر حجما من جهازي مايجي معها هالقطعة لازم تشترونها بشكل منفصل إذا حبيتوا هالخاصية ..
هذي القطعة صغيره اصغر من الكف وسعرها رخيص نسبياً وتستخدم بشكل مستقل بدون الجهاز
~
ثانياً : العلب والبرطمانات.
بصراحة ماكنت أتخيل اني بأحصل طريقة لإحكام إغلاق المعلبات بهالسهوله..
يعني بهالجهاز مع العلب كأن في بيتي مصنع احترافي للتعليب ، مثل برطمان المربى أو المخللات الي نفتحها وتطلع صوت ،
تخيلوا كم من الوقت بتحافظ على شكلها وطعمها بدون مايخربها الفتح..
العلب على عدة أشكال :
الأول: علب الميسون جارMason Jar الزجاجية اللي نشوفها الآن بكل مكان،
يجي لها قطعة صغيرة كإكسسوار للجهاز،
بمجر تركيب هالقطعة نقدر نستخدم الجهاز مع الميسون جار
بواسطة توصيل انبوب من الجهاز للقطعة ، الانبوب يجي مع كل الأجهزة..
إستخدامات الميسون جار :
كثير كتبوا تجاربهم مع هالعلب وتحضير الوجبات فيها،
لدرجة انه فيهكتب تباع في المكتبات متخصصه فقط بكيفية إعداد الوجبات مسبقا وحفظها في العلب،
بعضها يحضرون وجبات مجففة بحيث تجلس لهم سنوات ماتخرب وبس تحتاج اضافة مويه مغليه عليها وتكون جاهزه للأكل
وبعضهم يجهزون فيها سلطات تجلس بالأسبوع ماتخرب ..
مثلا بالنسبه للسلطات، نقطع السلطة ونرتبها في العلبة بترتيب معين السوائل تحت والورقيات فوق ، تجلس اسبوع كامل ما تغير فيها شي!
يعني كثير أجانب أشوفهم يضبطون لهم ٧ علب سلطة في يوم واحد وبجلسه وحده ، وكل يوم تصحى تاخذلها علبه وهي طالعة للدوام ، أو تحطها على الغدا بكل بساطه .. ولا فيه أي طعم (بايت) يعني إذا أكلوها بعد ثلاث ايام كأنهم ماكلين سلطه جلست في الثلاجه ساعات بس لو كانوا مفرغين الهوا من العلبه ..
شي خرافي!!
بالنسبة لي، أحب أقطع بعض الخضار ليومين أو ثلاث أو اسبوع واحتفظ فيها في الثلاجة
واصير استخدمها مع الطبخ حتى تقل مدة تحضيري للوجبة..
وأحيانا أقطع فواكه وأحطها في العلب تكون جاهزة للأكل لأيام
بس الصراحة انها ماتكمل يومين الا واحنا مخلصين عليها بسبب سهولة أكلها متى ما اشتهيناها مو مثل لو كانت تحتاج تغسيل وتقطيع
وهكذا كل شي نحتفظ فيه داخل العلبة ونفرغه من الهوا من أجبان أو مخللات أو صلصات وغيرها نضرب وقت صلاحيتها في ٥ ونستمتع بها على وقت رغبتنا..
*ملاحظه :بالنسبه للجزر اعبي العلبه مويه حتى يحافظ على شكله ومايجف، واستخدم المويه مع الشوربة ما أكبها لأن بعض القيمة الغذائية تتسرب لها من الجزر..
وأما بالنسبه للبصل نشوحه على النار ونحط معه البهارات قبل مانفرزنه عشان مايصير شكله ذايب بعد مانطلعه من الفريزر ..
لكن إذا باحطه في الثلاجه مايحتاج أطبخهقبل..
(كم وحدهقالوا لي البصل مايصلح يدخل الثلاجه بعد التقطيع لازم يستخدم مباشره أو بيصير سام ويتبكتر،
بحثت عن صحة المعلومة طلعت غير صحيحة ،طالما قوامه وريحته ولونه ممتازين مافيه مشكله يستخدم
وكاتبين في كثير من المواقع انه يحفظ بعد التقطيع في علبه محكمة الإغلاق لمدة من ٧-١٠ أيام .. للاستزادة هنا)
~
الثاني: علب خاصة مصممه من شركة الجهاز نفسه
تجي على مقاسات مختلفه وتكون بهالشكل:
طبعا ميزة العلب الثابته عن الأكياس انها ممتازه لحفظ المواد القابله (للهرس) يعني اللي ممكن تنضغط وتخرب أو تتكسر مثل الشيبس أو المارشملو ..
لو حطينا شيبس في كيس وفرغنا الهوا، الكيس بيضغط على الشيبس وبيتفتت في لحظات..
فالعلب هي الحل..
البسكويت وأشياء كثير تفقد قوامها بعد فتح العلبه وتكون إما لينه ومو مقرمشه أو تكون قاسيه وفقدت طراوتها اللي كانت محتفظه فيها لأسابيع وهي على أرفف المحلات
والسر كله بسبب الهواء اللي تعرضت له بعد فتح العلبه أو الكيس..
فأعتقد العلب حل جدا مناسب خصوصا بعد أيام الحفلات نكون فتحنا كميات كبيره من هالأشياء وتبقت بدون ما تؤكل وبعد أيام مانشتهيها ونرميها ..
~
الثالث: علبه خاصة بالتتبيل
هالعلبة فكرتها جدا جميلة،
تستخدم في تتبيل اللحوم أو أي شي نحب نخليه يتشرب المادة السائلة بسرعة..
بدل وضعاللحمه في كيس مع التوابل ونخليها ليله كامله في الثلاجة ، هالعلبة تسوي نفس المفعول خلال ١٠ – ١٥ دقيقة ..
طبعا المطلوب نحط اللحمه بداخل العلبه مع التوابل ونغلق عليها الغطا ثم نشبكها بالجهاز ونشغل الشفط
وبعد ماتنتهي من الشفط نخليها على جنب أو في الثلاجة لمدة ١٥ دقيقة وتصير اللحمه متبله وجاهزة وكأنها جلست يوم كامل ..
ملاحظه : حتى العلب الثانية ممكن تستخدم للتتبيل بنفس الطريقة بدل هالعلبة .. لكن هذي هم منتجينها خصصيصاً للتتبيل ومفعولها أسرع حسب ما قرأت..
..
الأسلوب الثالث
استخدام خاصية الإغلاق الحراري فقط بدون تفريغ الهواء..
التغليف الحراري مجال تبدعون فيه يعني نصمم أكياس بالطريقة اللي نحبها..
مثلا أحد الطرق اننا نسوي خطوط حرارية بالطول ، وبعدين نعبيها سموذي او عصير ونفرزنها وتصير ايس بوبز منزلية ..
شفت ناس يسوون هالحركة مع الزبادي بالفواكه للأطفال،
وبعضهم يعبيها عصير ليمون ومتى ما حب كاس عصير طازج ياخذ وحده ويتركها تذوب ويصبها في الكاس بدون حوسه ..
أنا كنت أحب أصلح ايسكريمات في البيت لكن اذا صلحتها كنت اتورط بعلبه القوالب
لانها كبيره وتاخذ مساحه من الفريزر ولا اقدر اطلعها الا اذا خلصت اخر ايسكريم منها ..
لكن مع التغليف صرت أقدر أغلف كل وحده لحالها مباشره بعد ماتتجمد وبشكل يشهي ونظيف..
طبعا اقدر اشفط الهوا منها لكن مو ضروري، الفكرة هنا اني اصنع أكياس خاصه بمقاساتي اللي أحبها..
طبعا الجهاز منه عدة أنواع وكلهم تقريبا نفس الغرض،
الإصدار اللي عندي أخذته بعد ماقارنت بين الأجهزة ومواصفاتها وأسعارها وهو من الأجهزة الجديدة
فأنصحكم به ، ويجي منه حجمين صغير وكبير ،
الكبير Foodsaver2100 .. الصغير Foodsaver2000
كل الأغراض اللي حطيتها اضغطوا على الصورة أو الاسم ويطلع لكم أسعارها ،
(ماحبيت أكتب السعر مباشره هنا لأن الأسعار تتغير كل فتره)
كل الجهازين يقومون بنفس الوظيفة بالضبط لكن فيه ثلاثة فروق:
الأول : الكبير فيه داخله مساحه للرول حق الأكياس البلاستيكية وشي يقطع الاكياس..
الثاني: الكبير فيه خاصية ال moist-dry وهي اللي نختار هل الأكل فيه سوائل أو جاف بحيث الجهاز يحاول مايسحب السوائل..
الفرق الثالث : الكبير يجي معه اكسسوار حق أكياس الزيبر وممكن يسحب الهوا منها، أما الصغير لازم تشترون القطعه منفصله اللي كتبت عنها فوق..اللي هي هذي
لكن من بعد التجربهتمنيت اني أخذت الصغير أحسن من ناحية مساحة المطبخ،
والمكان اللي بالداخل حق الرول اقدر استغني عنه بالراحه،
وميزة ال moist/dry مو دقيقة ، احط انه رطب مع ذلك يسحب المويه يعني مو لذيك الدرجة الميزة واضحه..
وهالميزه مالها علاقه بالعلب بس مخصصه للأكياس..
يعني باختصار أي نوع من الفود سيفر بيسوي لكم نفس النتائج ..
أنا أخترت حقي لأنه إصدار جديد وحصلته بسعر حلو ومميزاته كامله ومقاسه مناسب مو كبير بزياده..
ملاحظة:الجهاز على خط ١١٠
أجهزة ٢٢٠ تحصلونها فيأمازون بريطانيا ،
والأنواع الي في بريطانيا تختلف في الشكل لكنها بالضبط نفس المواصفات ومن نفس الشركة
وفيه مميزات أكثر من اللي عندي واضحة في الفيديو اللي في صفحة المنتج
كل الأغراض اللي في هالتدوينة موجودة في أمازون اضغطوا على الصور أو الكلمات وتوديكم للصفحة
~
وهالمرة عندي لكم مفاجأة لأول مرة على المدونة
.
.
.
تراآاآاآ~
لأني أحب هالجهاز جدا وأحبكم جدا جدا بأهديوحده من قائمة الأصدقاء جهاز يوصلها لبيتها ..
وبأهدي وحده ثانيه من متابعاتي على اليوتيوب جهاز ثاني يوصلها لبيتها ،
يعني جهازين هدية،
باختار من أصدقائي اللي مسجلين في قائمة الأصدقاء
أو من أصدقاء اليوتيوب، اسم قناتي في اليوتيوب : arwa karu
بيتم الأختيار بعد ثلاث أيام بإذن الله ..
طبعا بيوصلكم خبر عنأي هديةمباشرة على بريد الصداقة..
( تحديث : الهداياتكون في وقت نزول التدوينة مباشرة ،
هدية هذه التدوينةتم تسليمها لأصحابها ،
والاختيار كان بشكل مباشر عبر السناب والانستغرام )
المراجع:
للاستزادة في موضوع فساد الأطعمة هذا مقال باللغة الانجليزية واضح ومفصل
وهذي بعض مقاطع الفيديو توضح بعض الأشياء في الجهاز
...
